حسرت عمی   (ايلقار موذن زاده)  

تئلفون زنگ چالیر. یاشیل دویمه بارماغیمی باسیر. تئلفون آرخاسیندان ماچلی‌نین سسی گلیر. سانکی تئلفون دیره‌ک‌لری یول قیراغیندا اکیلمیش عسگرلر کیمی، ایکی اؤلکه‌نین ساواش مئساژلارینی بیر-بیرینه یئتیریر. سس‌لر تئللره تپیلیر. سسلرین سئویشمه‌سینده تئللر هؤرولور. قیرمیزی و ماوی سس‌لر یوخاری هیزلا گل-گئت‌ده‌دیرلر. قارقالارین قرمیزی سس‌لردن خوشلاری گلدیک‌لری اوچون سسیمی دیمدیک‌له‌ییرلر. سسلر باش باشا ده‌یدیک‌ده، بیر-بیریله سؤزو چیخیر و ساواشیرلار! دیشلرین دیبینده‌ن چیخان سؤزجوک‌لر، قولاق‌لارین دیبینه تاخیلیر. منیم‌سه سسیم قارقالارین چانقالی آلتیندا ایلیشیب قالیر. هردن‌سه سسیمین بوراخیلیب گئتمه‌یی، محله اوشاقلارینین قوش‌ووران لاریندان سیخیلان داشلاردان ایره‌لی گله‌بیله‌ر بلکه!

یئنه‌ده قاپانیر، قاپالانیرام. بیر داخما ایچینده دار-دار داریخیرام. من چوخ یالقیزام. اودا چوخ یال اوغلان! یالقیزلیغیمین پاسلی قاپیسینین آغزینا، یوخ دوداغینا! بیر قیز یاللاماق ایسته‌ییره‌م. اووف حسرت عمی، حئییف! پالچیغلی دویغولاریمین ایچینده دوشلریم، آیاقلاریندا چکمه دولانیر چتینلیکله، غیرچ-غورچ...   

دوشلریم پالچیغا، لیغا، یال لیغیما، اوغلیغیما، یالقیزلیغیما باتا-باتا بئینیمده دولانیر. یالقیزلیغیما یازیقلیغیم گلیر. یالقیز  لیغیما بیر قیز

ماچلی ایسه، کیمسه‌سیزلییینه دایاقلانماق اوچون بیر اوغلان. اودا بیر اوغ! ایسته‌ییر. اونا دایاقلانسین، آرخالانسین دییه. من چوخ اوغلانام. اودا چوخ قیز. من اوغلانمیش، او قیزمیش! دانیشدیقجا من آغلانیرام، او قیزاریر. بیر اوغلان قیزمیش اولورسا، بیر قیز آغلاییرسا و فیکیریمی قارالاییر موبایلیمین شارژ پولوسو. نمنه‌سئل سئل کیمی سوپورور وار یوخومو.

کئشگه کیمیمیز، کیمیمیزین سئوگیسینی قاناتمایایدی. کئشگه بو سئوگی قانماز اولمایایدی. قاناماز اولایدی! یوخه‌ه‌ه‌ه‌ه‌ه...چتین! قاشیم، قولاغیم، بورنوم، گؤزوم، آللاها گؤره هئچ بیر یئریم سو ایچمیر قانماغینا. بیر یئریم سو ایچسئیدی دویغولاریم بئله قوپ-قورو تاختا کیمی اولمازدی کی. چتینه‌‌ه‌ه‌ه‌‌ه‌ه قارداش! چتین بو قیز قاناجاق. قانسایدی کئشگه، قاناسایدی! اووف حسرت عمی نه تئز قوجالدین؟!!!

بو ایلک کز دیر اوغلانماق ایسته‌ییره‌م. آمما حئییف حسرت عمی حئییف.

اولو تانری دان، او... تان...ماسایدیم. دانلاماسایدیلار. هئی ماچلی! دانلاما سایدیلار سوچلاریمی، دان اولو تانری دان. او...تان...ماسایدیم سوچلاریمی. لولو منی یئمه سئیدی. دویغولو تانری، او لولو تانریدان... او...تان...ماسایدیم.

لولو تانری‌نین آدیلا باشلاییریق. اووف آی قیز بسدیر. قاسناق باغلامیش سئویگی‌میزی قورتدالاما آرتیق، یئنه‌ده قانی آچیلار. یئتر داها ماچلی چرلتمه، باش قولاغیمی یئره تؤکمه، لازیمیم دیر! سن بیر سؤز دئنه‌ن حسرت عمی، بیراز آجیقلان بو قیزا...!

توتساق   (ایلقار موذن زاده)

_{یئرین گؤیون ایشلرینی دایاندیرمیشام. بوتون کاینات منی ایزله‌ییر. باشقا دونیانین آداملاری بئله دالیم سوره گلیب‌لر. بیر هفته دیر نه اؤله‌ن وار نه یاس توتان؛ هله لیک آفریقادا هئچ کیمسه آجیندان اؤلمور. هئچ بیر اوغلان هئچ بیر قیزا دییه بیلمیر "سندن ساری اؤلوره‌م!”. اؤلومه یاندی-قیندی وئریره‌م. دونیانی وورموشام بیربیرینه. قبریستانلار بیر هفته دیر قاپالی‌دیر. چوخ سینیرلیه م و چوخ کدرلی، آرتیق 8 گوندور سئوگیلیمین اؤلومونه گؤره قانیم قارالیب و تانریلا ساواشدیغیمدا، عزرائیلی توتساق* توتموشام!}

 87-قیش-اهر

*توتساق: گروگان

نردووان   (ایلقار موذن زاده)

^{گونش اليني يانديرميردي. داغلارين اوستونده قيرميزي گونشي گؤيدن ساللاييب، تارلالارين بؤيرونده بير نئچه آغاج اكدي و بير توت آغاجي نين بوداقلاري آراسينا، قيرميزي بير باشماق تايي تولازلادي. سونرا ياواش-ياواش بير ائوده تيكيب، حه‌يه‌طين اورتاسيندا بير حؤوض يئرلشديرمك فيكرينه قالدي. چوخلو چاليشان‌دان سونرا، ائوين گون چيخان طرفينده بير دامچا تيكيب، گون باتان طرفينده‌ده بير تؤيله تيكدي. بونلاري قورتارديقدا، داغلارين قوجاغيندا بير نردووان يئرلشديردي. آغاجلارين بؤيرونده، ائو، دامچا و هابئله تؤيله نين اوزه‌رينه‌ده بير نردووان دايادي.}

^{سارا رسیمی نی قورتاريب معلليمين ماساسينا ساري يورودو. اونون عائيله سيندن سونرا، بوتون عائيله لر اوخولون رسیم ياريشينا گلميشديلر. ميدادلا مانتوسونون دويمه سيني اويناديردي. باشيني آشاغي سالدي. آياقلارينداكي قيرميزي باشماق لار، همشه آناسي ني خاطيرلاديردي؛}

^{نئچه ايل بوندان اؤنجه، آناسي آغاجدان ييخيليب اؤلنده، سارا ائوده تك ايدي...!}

^{مئشه   (ايلقار موذن زاده)}               

^{بولودلار اوست_اوسته قالانمیش پامبیق کیمی گؤیون هر یئرینی دولدورموشدولار.}

^{ناهار چاغی گونش بیر نئچه ساهات شاخمیشدی و دومانلیقدا بوغولان  مئشه، داشقا اوستونده ساتیلان لبی‌لر کیمی بوغلاییردی.}

^{مئشه‌ده اونلاردان سونرا هئچ کیمسه گؤزه گؤرونموردو. سس‌سیزجه بالاجا بیر آغاجلیق دره‌ده، گؤزلرینی بیربیرینه توخوموشدولار. گونشین سون قیرمیزی جیویلری آلتیندا، آغاجلارین بوداقلاری اوجونا، ائله‌بیل دولچا_دولچا قیرمیزی بویا چیله‌نمیشدی. هر طرفی یاواش_یاواش سویوق بورویوردو. هاوا سویوقلاشدیقجا داها چوخ بیربیرلرینه یاخینلاشیب، داها کؤنوللو قوجاقلاشیردیلار. مئشه‌ده کیمسه یوخ‌ایدی و اونا گؤره فیکیرلری دینج!}

^{بیراز اویانلیقدا بیر حاجی‌لئی‌له‌یین یوواسی، اوزون و لوت بیر قله‌مه‌نین اورتالاریندا یاواش_یاواش قارانلیغین ایچینده اریمکده‌ایدی. هر دبره‌نده آلتلارینداکی سویوق چؤر چؤپ گؤوده‌له‌رینه باتماسایدی، داها لذت‌لی اولاردی. ایستی قوللارینین آراسیندا، سئویشیردیلر. هاوا داها سویوقلاییر و اونلار داها سیجاقجاسینا بیربیرینی قوجاقلاییردیلار.}

^{آنسیزین؛ آتدیم‌لارین خیشیلتیسی، اونلاری دیسکیندیریب نشئه‌لرینی پوزدو. هر ایکی‌سی بیربیرینین قوجاغیندایکن دایاندیلار. قولاقلارینی ایتیلدیب و سس گله‌ن یؤنه گؤزلرینی تیکدیلر. بیر قارالتی الینده بیر توربا، قورباغا گؤلونون بؤیرونده‌ن ساووشوب، بالاجا دره‌یه ائنمک ایسته‌دی. جاباق(خزه) ‌باغلامیش بیر یئکه داشین اوستونده، قارا پوتون‌لارینی گؤروردولر. بئلینده توربا اولان قارالتی، الینی قورو قلمه‌یه سؤیک‌ییب یئره آتیلدی و نئچه مئتیر‌لییینده‌کی آغاجی گؤرره‌ک، قیرمیزی بیر سئوینج گؤزلرینده دالغالاندی. ایتیره‌ن آختاردیغینی تاپان کیمی، آغاجی باغرینا باسیب مئشه‌ده قا‌ه قا‌ها سالدی. گولمه‌ک‌لرینین سسی بیر قوجا اووسونجو قارینین قورخولو گولمک سسی کیمی مئشه‌ده تکرارلانیردی. اونلار او قارالتی‌نی یاخین‌لیق‌دا گؤردویونده، قوجاقلاشدیقلاری یئرده بیر یارپاق کیمی تیر_تیر تیتره‌ییردیلر. اوره‌ک‌لری آسفالتا دوشموش بیر بالیق کیمی چیرپینیردی.}

^{قارالتی تورباسینی یئره قویوب ایچینده‌ن قارا دسته‌لی بالتاسی‌نی گؤتوردو.}

^{قورخودان قندیل کیمی دونموش و سس‌سیز قوجاقلاشدیقلاری یئرده قوروموشدولار. آغاجین قارنی یاریلیردی و بالتانین گوپبولتوسو بیر اسید کیمی مئشه‌نین یوخوسونا دامجیلاییردی. بیر نئچه دیقا گوپبولتودن سونرا، آغاج بیر زاریلتیلا یئره دوشدو. اونلار بیر_بیرلرینی باغیرلاریندا، اوچولموش یووالاری آلتیندا گؤزلرینی یومموش‌دولار. بیر قارقا سسی مئشه‌یه داغیلدی. بؤیوک بیر یاشیل چریککه، قارقانین آغزیندان دوشوب قارالتی‎نین آردیندا قارانلیقدا ایتدی. ائله بیل آنا بیراز یوبانمیشدی...}

بیر شه‌هر گؤز   (ايلقار موذن زاده)

سحر چاغی یوخودان کال کیمی دوروب، گئجه‌د‌ن قالمیش قانلی پیچاغی یویاراق، گیجه‌له- گیجه‌له گئیینیب، خییاواندا اوزو آشاغی دیغیرلانیرام. بیر تاکسی‌چی اؤنومده ساخلاییر و فرمانین آرخاسیندان باشینی آشاغا ایه‌ر‌ک، منه زیلله‌نیر.

-گئتمیر‌م قارداش، دئییر‌م.

بیر آزدا دایانیب باخیر و باشینی بوللایاراق سوروب گئدیر. آرخاسی سوره ماشینا باخیرام و سوروجونون ایشینه شوبهه‌له‌نیر‌م. قاباغدان بیر قادین گلیر، اوشاغی نین الیندن یاپیشمیش، منی گؤره‌ر‌ک دیسکینیب دوداغینی دیشله‌ییب ساووشور. دؤنوب قادینا باخیرام و آددیملادیغیم یئرده قادی نین گؤستردیی تپکی منی فیکیره دالدیریر. دؤرد نفر گنج قیز بیر-بیریله دانیشیب گوله-گوله، خیاوانین اوتاییندا یئریدیک لری یئرده، منی گؤره‌رکن دایانیب شاشقینجاسینا بیر-بیرینه باخیب، باشلارینی توولاییرلار، سانکی اؤلو ییئه‌ن گؤروبلر. یاواش-یاواش اؤزومه شکّ ائدیب اوستومه باشیما باخیرام. زیپیم آچیقدیر، یوخسا باشیمین توکو بیز دایانیب؟ کؤینه‌ییمی ترسینه گئیمیشم، یوخسا شالواریمین آیاغی جورابیمدا قالیب؟

هر یولدان کئچن، هر آراباچی، توکانچی و بوتون شه‌هر منه باخیر. بیر شه‌هر گؤز داشیییرام اؤزومله بیرگه. خییاواندا یئریدییم یئرده، بدنیمه تیکیلمیش گؤزلر، قیییق کیمی سانجیلیب گؤوده‌مه.

خیالا دالیرام. دونن یاپدیغیم جینایتی دویوب مو شه‌هر؟

 شه‌هرین اورتا دؤرد یولونا یئتیشه‌ر‌ک، همه‌شه آچیق اولان قفه‌نی باغلی گؤرور‌م و بیر یازی قفه‎نین شوشه‌سینه یاپیشدیریلمیش. یازیدان هورکه‌ر‌ک، الیمده‌کی آلمانین چؤته‌لینی یاواشجاسینا آرخین ایچینه دیغیرلادیب آغزیمی سیلیر‌م.

 قفه ایفطاردان سونرا آچیلاجاق...

اوچوروم   (ایلقار موذن زاده)

اؤنومده بیتمیش داغین زیروه سینه چیخیرام. دومانلانیر هاوا، یولومدان جاییرام. آیاغیمین آلتیندا قورخونج بیر اوچوروم گؤیه ییر. دیغیرلانیب باشی بئینی پارتلاییب سیلدیریم لارا سپه له نیر، آیاغیمین آلتیندان قاچان داشلار. گوپبولتویله داشلارین باشیندا چارتلاییر، قورخولاریمین شوشه لیگی.